Svilup

Lavur da translaziun è lavur da basa per la prosperitad da mintga lingua. Questa constataziun vala spezialmain er per ina lingua minoritara e periclitada sco il rumantsch. Uschia cumpiglia il servetsch linguistic da la Lia Rumantscha gia da l'entschatta ennà in post da translaziun.

Ultra da quai han ins introducì ils onns 1996/97 cun sustegn dal chantun servetschs linguistics organisads sin basa regiunala. La finamira è stada da porscher in sustegn linguistic a las vischnancas e regiuns che han fixà il rumantsch sco lingua uffiziala e da scola.
Concret hai dà trais posts da translaziun regiunals, manads da la Pro Engiadina Bassa/Val Müstair, da la Romania/Renania e da l'Uniun rumantscha da Surmeir.
La lavur prestada ils davos onns mussa ch'il sustegn linguistic è in instrument impurtant per segirar la preschientscha dal rumantsch sin differents secturs. Blers texts da different gener na fissan probablamain betg vegnids publitgads en rumantsch senza la purschida d'in servetsch da translaziun.

Dapi l'onn 2000 ha il chantun Grischun surdà il mandat per quest servetsch a la Lia Rumantscha. En spezial duai il servetsch linguistic

- daventar pli enconuschent ed uschia survegnir dapli muntada ed irradiaziun
- garantir ina lavur professiunala ed effizienta
- daventar accessibel pli facilmain per ils clients.

Per quest motiv han ins decidì da restructurar il servetsch linguistic regiunal sut il num ‚Sling'.


Purtaders ed intent

Purtaders dal servetsch linguistic èn il chantun Grischun e la confederaziun. Per incumbensa da quels presta la Lia Rumantscha il servetsch cun agid d'ina rait da collavuraturas e collavuraturs en las regiuns.

Il servetsch linguistic (‚Sling') duai facilitar l'applicaziun dal rumantsch, rinforzar sia preschientscha e gidar ad actualisar la terminologia. Il servetsch porscha in support linguistic per instituziuns publicas (vischnancas, circuls, districts ed autras corporaziuns publicas) sco er organisaziuns e manaschis da gronda muntada en la regiun (posta, spitals regiunals, ovras electricas e.u.v).
Quest sustegn linguistic vegn prestà en furma da cussegliaziuns linguisticas en general, da lectorats e da translaziuns. Plinavant vegn pussibilità l'access ad ina collecziun da texts da model via la pagina d'internet. Tenor situaziun e basegn vegnan era sviluppadas ulteriuras activitads per promover il diever dal rumantsch tar las instituziuns numnadas (p. ex. organisaziun da curs da lingua specifics).